អបអរសាទរ ព្រះរាជពិធីបុណ្យចម្រើនព្រះជន្មគម្រប់ ៧០ យាងចូល ៧១ ព្រះវស្សានៃ ព្រះករុណាជាអម្ចាស់ជីវិតលើត្បូង ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃ ព្រះរាជាណាចក្រកម្ពុជា ជាទីគោរពសក្ការៈដ៏ខ្ពង់ខ្ពស់បំផុត
បពិត្រ ព្រះករុណាជាអម្ចាស់ជីវិតលើត្បូង ជាទីគោរពសក្ការៈ និងជាទីស្រលាញ់ដ៏ខ្ពង់ខ្ពស់បំផុត នៃប្រជានុរាស្ត្រកម្ពុជា
នៅក្នុងឱកាសដ៏មហានក្ខត្តឫក្សឧត្តុង្គឧត្តមប្រពៃថ្លៃថ្លានៃ ព្រះរាជពិធីបុណ្យចម្រើនព្រះជន្មវឌ្ឍនាមង្គលដ៏វិសេសវិសាលគម្រប់ ៧០ យាងចូល ៧១ ព្រះវស្សា នៃព្រះករុណាជាអម្ចាស់ តាងនាមទូលព្រះបង្គំជាខ្ញុំ ខ្ញុំម្ចាស់ ជាប្រជានុរាស្ត្រទូទាំងព្រះរាជាណាចក្រកម្ពុជា មានសេចក្ដីសោមនស្សរីករាយ សូមលំឱនកាយលើកហត្ថប្រណម្យបង្គំអញ្ជលី សូមបួងសួងដល់គុណបុណ្យព្រះរតនត្រ័យកែវទាំងបី អស់វត្ថុសក្តិសិទ្ធក្នុងលោក ទេវតាថែរក្សាព្រះមហាស្វេតឆ្ឆត្រ គុណបុណ្យព្រះបារមីអតីត ព្រះមហាក្សត្រ ព្រះមហាក្សត្រីយានីខ្មែរគ្រប់ព្រះអង្គ ជាពិសេសបារមីតេជានុភាព ព្រះវិញ្ញាណក្ខន្ធ នៃព្រះករុណា ព្រះបរមរតនកោដ្ឋ ជាទីគោរពសក្ការៈដ៏ខ្ពង់ខ្ពស់បំផុត សូមមេត្តាតាមជួយគ្រងអភិបាលថែរក្សាការពារ និងប្រោះព្រំនូវទឹកអម្រឹតប្រទានព្រះរាជសព្ទសាធុការពរ បវរសួរស្តី សិរីវឌ្ឍនាជយាមង្គល វិបុលសុខមហាប្រសើរថ្វាយ ព្រះករុណាជាអម្ចាស់ជីវិតលើត្បូង ព្រះបាទសម្ដេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា ជាទីគោរពសក្ការៈដ៏ខ្ពង់ខ្ពស់បំផុត នៃប្រជានុរាស្ត្រកម្ពុជា សូមព្រះអង្គ ព្រះប្រកបតែ ព្រះបរមសុខគ្រប់ប្រការ ព្រះរាជសុខភាពល្អបរិបូរណ៍ ព្រះកាយពលមាំមួន ព្រះរាជបញ្ញាញាណភ្លឺថ្លា ដើម្បីគង់ប្រថាប់ជា មហាម្លប់ដ៏ត្រជាក់ ដល់កូនចៅប្រជានុរាស្រ្ត នៃព្រះរាជាណាចក្រកម្ពុជា ដរាបតរៀងទៅ។
សូម ព្រះករុណាជាអម្ចាស់ជីវិតលើត្បូង ជាទីគោរពសក្ការៈដ៏ខ្ពង់ខ្ពស់បំផុត ព្រះមេត្តាទទួលនូវសេចក្ដីគោរពដ៏ខ្ពង់ខ្ពស់បំផុត និងស្មោះស្ម័គ្រជាទីបំផុត អំពីទូលព្រះបង្គំជាខ្ញុំ ខ្ញុំម្ចាស់ជាប្រជានុរាស្រ្តក្រោមព្រះតេជះតម្កល់លើត្បូង។
ក្រាបបង្គំទូលថ្វាយនៅភ្នំពេញ ថ្ងៃទី១៤ ខែឧសភា ឆ្នាំ២០២៣
