ភ្នំពេញថ្ងៃទី០១ ខែមិថុនា ឆ្នាំ២០២៣ -
នៅឯកិច្ចសន្ទនាអាស៊ាន-កាណាដាលើកទី២០ ដែលបានធ្វើឡើងនៅទីក្រុងគូឡាឡាំពួ ប្រទេសម៉ាឡេស៊ី កាលពីថ្ងៃទី៣០ ខែឧសភា អាស៊ាន និងកាណាដាបានអះអាងសារជាថ្មីនូវការប្តេជ្ញាចិត្តរបស់ពួកគេក្នុងការពង្រីកកិច្ចខិតខំប្រឹងប្រែងដើម្បីបញ្ជាក់ទំនាក់ទំនងយូរអង្វែងរបស់ពួកគេក្នុងគោលបំណងនាំយកភាពជាដៃគូឡើងដល់កម្ពស់ថ្មីមួយ។
កិច្ចប្រជុំនោះត្រូវបានដឹកនាំរួមគ្នាដោយអគ្គលេខាធិការនៃក្រសួងការបរទេសម៉ាឡេស៊ី និងជាប្រធាន SOM នៃប្រទេសម៉ាឡេស៊ី លោក អាំរ៉ាន់ ម៉ូហាម៉េដ ហ្ស៊ីន (Amran Mohamed Zin) និងជំនួយការអនុរដ្ឋមន្ត្រីអាស៊ីប៉ាស៊ីហ្វិកនៃកិច្ចការសកលរបស់ប្រទេសកាណាដា លោក វែលដុន អេបប៍ (Weldon Epp) ដោយមានការចូលរួមពីមន្ត្រីជាន់ខ្ពស់អាស៊ាន មន្ត្រីតំណាងលេខាធិការដ្ឋានអាស៊ាន និងទីម័រឡេស្តេដែលជាអ្នកសង្កេតការណ៍។
នៅក្នុងព្រឹត្តិការណ៍នោះ ប្រទេសកាណាដាបានបង្ហាញពីការគាំទ្រឥតងាករេរបស់ខ្លួនសម្រាប់កិច្ចខិតខំប្រឹងប្រែងកសាងសហគមន៍អាស៊ាន ជំនួយឆ្ពោះទៅរកការងើបឡើងវិញក្នុងតំបន់ពីជំងឺរាតត្បាតកូវីដ១៩ និងការប្តេជ្ញាចិត្តចំពោះភាពជាកណ្តាលរបស់អាស៊ានតាមរយៈការចូលរួមយ៉ាងសកម្មនៅក្នុងយន្តការដឹកនាំដោយអាស៊ាន។
ភាគីទាំងពីរបានស្វាគមន៍ចំពោះការរីកចម្រើនជាវិជ្ជមានដែលបានធ្វើឡើងក្នុងការអនុវត្តផែនការសកម្មភាពអាស៊ាន-កាណាដា (ឆ្នាំ២០២១-២០២៥) និងបានទទួលស្គាល់ការពង្រឹងកិច្ចសហប្រតិបត្តិការរវាងភាគីទាំងពីរទៅលើសសរស្តម្ភទាំងបីរបស់សហគមន៍អាស៊ាន។
ពួកគេបានចែករំលែកអំពីសារៈសំខាន់នៃការពង្រឹងកិច្ចសហប្រតិបត្តិការសេដ្ឋកិច្ចក្នុងវិស័យសំខាន់ៗនៃពាណិជ្ជកម្ម និងការវិនិយោគ។ ដោយទទួលស្គាល់អំពីសក្ដានុពលសេដ្ឋកិច្ច ពួកគេបានទន្ទឹងរង់ចាំនូវវឌ្ឍនភាពស្ថាបនានៃកិច្ចចរចាកិច្ចព្រមព្រៀងពាណិជ្ជកម្មសេរីអាស៊ាន-កាណាដា (FTA) ដែលកំពុងដំណើរការ។ សម្លឹងឆ្ពោះទៅមុខនៃកិច្ចប្រជុំគណៈកម្មាធិការចរចាកិច្ចព្រមព្រៀងពាណិជ្ជកម្មអាស៊ាន-កាណាដា លើកទី៤ (TNC) ដែលគ្រោងធ្វើនៅខែក្នុងមិថុនានេះ៕ (ប្រភព VNA បកប្រែដោយលោក យា ចិន្តាខន្តី)
