កណ្ដាល ថ្ងៃទី០៧ ខែមិថុនា ឆ្នាំ២០២៣
ប្រមុខរាជរដ្ឋាភិបាលកម្ពុជា សម្ដេចអគ្គមហាសេនាបតីតេជោ ហ៊ុន សែន បានថ្លែងថា ការធ្វើជាម្ចាស់ផ្ទះរបស់កម្ពុជា ក្នុងការរៀបចំការប្រកួតកីឡាស៊ីហ្គេម និងកីឡាអាស៊ានប៉ារ៉ាហ្គេម យើងអត់យកបញ្ហាមេដាយជាអាទិភាពនោះទេ យើងយកការប្រកួតប្រកបដោយមិត្តភាព សុវត្ថិភាព និងការទទួលស្វាគមន៍ភ្ញៀវឱ្យបានល្អ គឺជាគោលដៅធំ។
ក្នុងពិធីបើកការដ្ឋានសាងសង់ ផ្លូវល្បឿនលឿនតភ្ជាប់ពីរាជធានីភ្នំពេញទៅក្រុងបាវិត- នៅស្រុកកៀនស្វាយ ខេត្តកណ្ដាលនាព្រឹកថ្ងៃទី០៧ ខែមិថុនា ឆ្នាំ២០២៣ សម្ដេចតេជោនាយករដ្ឋមន្ត្រីបានមានប្រសាសន៍អរគុណចំពោះគណៈកម្មការរៀបចំការប្រកួត និងអរគុណចំពោះប្រមុខរដ្ឋ ប្រមុខរដ្ឋាភិបាលនៃបណ្ដាប្រទេសអាស៊ាន និងប្រទេសទីម័រខាងកើត ដែលបានបញ្ជូនក្រុមកីឡាស៊ីហ្គេមមកកាន់កម្ពុជា ដែលពេលនោះមានចំនួនជាង១ម៉ឺននាក់ ហើយឥឡូវកីឡាប៉ារ៉ាហ្គេមមានជាង ២ ០០០ នាក់ មកប្រកួតនៅកម្ពុជា ដែលកម្ពុជាទទួលការថែទាំគ្រប់យ៉ាងទៅលើសុខុមាលភាព និងការសម្រួលនានា រាប់ទាំងក្រុមយុវជនស្ម័គ្រចិត្តរបស់កម្ពុជាផងដែរ ដើម្បីឱ្យការស្នាក់នៅរបស់ពួកគេបានទទួលជោគជ័យ។ សម្ដេចតេជោនាយករដ្ឋមន្រ្ដីរម្លឹកថា កាតព្វកិច្ចបង់ប្រាក់សម្រាប់ការចូលរួមប្រកួតដូចនៅប្រទេសនានា កម្ពុជាមិនបានធ្វើនោះទេ។ កម្ពុជាក្រ តូចពិត ក៏ប៉ុន្តែកម្ពុជាមានចិត្ត ក្រប្រាក់កាស ក៏ប៉ុន្តែចិត្តគំនិតរបស់យើងមិនក្រទេ។ សម្ដេចតេជោបានបន្ដថា កម្ពុជាតូច ក៏ប៉ុន្តែមានបេះដូងធំ ទទួលស្វាគមន៍ភ្ញៀវហើយធ្វើយ៉ាងណាឱ្យមានសុវត្ថិភាព។ ដូចដែលសម្ដេចធ្លាប់និយាយថា លុយអាចចាយអស់ ក៏ប៉ុន្តែកិត្តិយស កេរ្ដិ៍ឈ្មោះ សេចក្ដីថ្លៃថ្នូររបស់ជាតិ និងស្ថិតស្ថេររាប់ជំនាន់មនុស្សទៅថ្ងៃក្រោយ។ សម្ដេចតេជោបន្តទៀតថា យើងចង់ពង្រឹងសាមគ្គីភាពក្នុងចំណោមប្រជាជនអាស៊ានរបស់យើង ដែលមានចំនួនជាង ៦០០ លាននាក់ តាមរយៈកីឡានេះឯង។ «យើងចង់ឱ្យមានទំនាក់ទំនងកាន់តែជិតស្និទ្ធរវាងប្រជាជន និងប្រជាជន តាមរយៈវិស័យកីឡា ហើយយើងក៏ចង់ឱ្យវិស័យកីឡារបស់អាស៊ានក្លាយទៅជាកីឡាដ៏ខ្លាំង នៅក្នុងក្របខ័ណ្ឌតំបន់រ ដែលនេះជាទស្សនៈទាននាពេលអនាគត ដែលចាប់ផ្ដើមពីកម្ពុជា ហើយសង្ឃឹមថា ប្រទេសនានានឹងចូលរួម ជាមួយនឹងអ្វីដែលជាការគិតគូររបស់កម្ពុជា»។ នេះជាការបញ្ជាក់បន្ថែមរបស់សម្ដេចតេជោនាយករដ្ឋមន្រ្ដី។
សម្ដេចតេជោ ហ៊ុន សែន ក៏បានថ្លែអំណរគុណជាថ្មីម្ដងទៀត ចំពោះរដ្ឋាភិបាលនៃសាធារណរដ្ឋប្រជាមានិតចិន សម្រាប់ការផ្ដល់ជំនួយជាពហុកីឡាដ្ឋានជាតិមរតកតេជោ ដែលបង្កលក្ខណៈងាយស្រួលដល់កម្ពុជា ក្នុងការរៀបចំធ្វើជាម្ចាស់ផ្ទះ ការប្រកួតកីឡាស៊ីហ្គេមលើកទី៣២ និងកីឡាអាស៊ានប៉ារ៉ាហ្គេមលើកទី១២ ហើយដែលជំនួយជាពហុកីឡាដ្ឋានជាតិនេះ មិនមែនត្រឹមតែជាមរតកសម្រាប់តែថ្ងៃនេះទេ យើងទុករហូតដល់១០០ឆ្នាំទៀតក៏ប្រើប្រាស់បានដែរ ដើម្បីពង្រឹងសមត្ថភាពកីឡារបស់កម្ពុជាយើង៕
